Illum iċ-Chairperson ta’ ADPD Carmel Cacopardo poġġa bukkett fjuri fuq il-monument ta’ Karin Grech f’San Ġwann. Id-Deputat Chairperson Mario Mallia għamel diskors kommemorattiv waqt iċ-ċermonja qasira li saret illum.
43 sena ilu, Karin Grech inqatlet, vittma nnoċenti f’nofs konfrontazzjoni dejjiema bejn it-tobba u l-gvern fl-1977. Kienet il-ħaruf tas-sagrifiċċju fuq l-artal tat-tpattija; tal-interessi ta xi ħadd li ħaseb li r-raġun jinkiseb bil-vjolenza. Traġedja nazzjonali li baqgħet ferita miftuħa. Min qatilha baqa’ mistur jgħix bil-kuxjenza tqila li ħasad il-ħajja ta’ persuna innoċenti li l-uniku ħtija tagħha kienet li nzertat it-tifla ta’ missierha.
Il-memorja. Xi riflessjonijiet.
Is-swaba baqgħu persistenti tul is-snin jippuntaw u jixlu lil tan-naħa l-oħra. Hekk ġara fil-każ ta’ Raymond Caruana. Hekk ġara fil-każ ta’ Karin Grech. Dik martri tagħna u dak il-martri tagħkom. Għax bħallikieku, li jgħodd mhux id-demm imxerred, imma d-demm ta’ min hu. Domna s-snin twal biex tgħallimna mod ieħor. It-tribaliżmu politiku serva ta’ satra u ċpar li għen mhux ftit biex l-assassini li ħasdu ħajjiet innoċenti jibqgħu jinħbew. L-alleanzi politiċi dallmu r-raġuni, aljenaw, u żammew il-verita` milli titla’ f’wiċċ l-ilma. U l-verita` għadna ma nafuhiex. U l-ġustizzja tibqa’ ma tistax issir.
It-traġedja hi li mill-istorja ma tgħallimniex. Gerrbu s-snin, u l-istorja tat-tribaliżmu li jdallam kompliet tirrepeti ruħha. Komplejna nħallu lil dawk li jirnexxihom iġibuha żewġ ma kull naħa, jagħmlu triq fil-baħar. Iħossuhom invinċibbli. Hemm min poġġa lilu nnifsu f’xirka esklussiva, fuq pedestal fejn iħoss li ma jista’ jmissu ħadd. Dawn talin li jġibuha żewġ sakemm il-kumplament mehdijin f’xulxin. U l-aljenazzjoni tribali tingrana u tiħrax u tigi saħansitra ffinanzjata mill-istess interessi. l-importanti li ħobż l-interessi jibqa’ maħbuż. Sadanittant, min jiflaħ l-inqas jikkrepa u jaqla’ fuq rasu; joħdulu l-ispazji miftuħa, jerdgħulu flusu, jispekulaw b’ġidu, u jmarrduh. Il-vittma nnoċenti fil-gwerra tal-interessi terġa’ tirrepeti ruħha.
Karin Grech inqatlet għax min kellu s-saħħa, xewwex u ddemonizza. Tan-naħa l-oħra ma baqgħux nies imma saru għadu. Periklu Nazzjonali. Irmixk. Id-diskors li jingħad, darba darbtejn tlieta, idawwar perspettiva. Isaħħan l-imħuħ. Isir il-verita`. Iċappas ħama li difficli taqilgħu. Irawwem eġemonija. Ikattar il-vjolenza. Minn dak iż-żmien, il-militanza battiet kemmxejn, imma l-periklu kiber. L-għodda tal-midja soċjali fejn id-diskors li jintqal ma jibqax fit-triq quddiem palk waqt xi meeting, imma jidħol fid-djar, fl-imħuh u l-qlub, sar xafra li tinfed iktar. Id-diskors ta’ pajjiż full up għal min irridu u meta jaqbel lilna, jitfa’ l-madmad fuq l-innoċenti minflok fuq min qed jerdagħlhom demmhom u saħħithom. Id-diskors sessista u vjolenti fil-konfront ta’ persuni attivisti fil-kamp oppost jixref rasu b’mod persistenti; “prostituta”, “traditur”, “għadu”, fost aġġettivi oħra. Il-kliem vjolenti irawwem kultura ta’ vjolenza. Xejn iktar u xejn inqas.
Ftit nesponu lit-tfal tagħna għall-istorja ta’ pajjiżna. Bil-wisq inqas nesponuhom għall-istorja riċenti. Nibżgħu wisq li noqorsu. Nibżgħu minn edukazzjoni kritika, ma jmorrux ipinġuna partiġjani. Ħallejniha għal edukaturi senstitizzati flok għaġġinniha sistematikament fil-qafas edukattiv. Ħasra. Għax ir-rwol tal-edukazzjoni huwa li ddawwal, mhux li tħalli kollox kif inhu.
Dmirna llum imur lilhinn minn tifkira ta’ dan il-qtil brutali. Imur lilhinn saħansitra minn għajta biex il-qattiel/a jitressqu quddiem il-ġustizzja. Irid ikun memorja ħajja. Irid ikun riflessjoni. Responsabbilta` kollettiva. Inkella, t-tifkira tibqa’ sempliċi ċerimonja. Inkella, Karin Grech tibqa’ tinqatel kuljum.
